भारतमा सिकेको सीप स्वदेशमै प्रयोग गर्दै ३१ वर्षदेखि चाउमिन व्यवसायमा जोशी।

भदौ ३ कञ्चनपुर-
भारतमा रोजगारीका क्रममा सिकेको सीपलाई स्वदेश फर्किएपछि आफ्नै व्यवसायमा प्रयोग गरेका कञ्चनपुरको कृष्णपुर नगरपालिका–५ का ७१ वर्षीय कजैराज जोशी विगत ३१–३२ वर्षदेखि चाउमिन उत्पादन तथा बिक्री–वितरणमा सक्रिय छन्।
पुख्र्यौली घर दार्चुलाको शैल्यशिखर नगरपालिका–८, झारकाडा भएका जोशीले भारतमा काम गर्दा सिकेको सीप र अनुभवलाई आधार बनाएर स्वदेशमै चाउमिन उत्पादन सुरु गरेका हुन्। सुरुवाती दिनमा सीमित स्रोत–साधन र विभिन्न चुनौतीको सामना गर्नुपरे पनि उनले निरन्तर मेहनत र संघर्षका साथ व्यवसायलाई अघि बढाउँदै आएका छन्।
जोशीले चाउमिन उत्पादनमा सकेसम्म अर्गानिक तथा गुणस्तरीय सामग्री प्रयोग गर्दै आएको बताएका छन्। आफ्नै हातले उत्पादन गर्दै आएका उनले उत्पादनको गुणस्तर र ग्राहकको विश्वासलाई व्यवसायको मुख्य आधार बनाएका छन्।
यही व्यवसायबाट परिवारको घरखर्च चलाउनुका साथै सन्तानलाई उच्च शिक्षा प्रदान गर्न र घर–जमिन जोड्न सफल भएको उनले बताए। चाउमिन व्यवसायबाटै एक छोरालाई सब–इन्जिनियर र अर्का छोरालाई टेक्निसियन पढाउन सफल भएको उनले बताए। उनका दुवै छोराले अध्ययनपछि रोजगारीसमेत प्राप्त गरिसकेका छन्।
विदेशमा सिकेको सीप आफ्नै देशमा प्रयोग गर्न सके आत्मनिर्भर बन्न सकिन्छ,’ जोशीले भने।
उनका अनुसार पछिल्लो समय धनगढी, अत्तरिया लगायत विभिन्न स्थानबाट समेत ग्राहक चाउमिन खरिद गर्न आउने गरेका छन्। लामो समयदेखि व्यवसाय सञ्चालन गर्दै आएका कारण आफू र ग्राहक दुवै सन्तुष्ट रहेको उनले बताए।
थोरै लगानी र मेहनतका साथ कामलाई निरन्तरता दिन सके स्वदेशमै स्वरोजगार बन्न सकिने उनको भनाइ छ।
७१ वर्षको उमेरमा समेत व्यवसायमा सक्रिय जोशीको तीन दशक लामो यात्रा मेहनत, संघर्ष र आत्मनिर्भरताको उदाहरण बनेको छ। भारतमा सिकेको सीपलाई स्वदेशमै प्रयोग गर्दै उनले आफ्नो व्यवसायबाट परिवारको आवश्यकता पूरा गर्नुका साथै सन्तानको शिक्षादेखि घर–जमिन जोड्नेसम्मको यात्रा तय गरेका छन्।